0
0
ജില്ലാ ലീഗ് ക്രിക്കറ്റ് എ ഡിവിഷന്‍ ടൂര്‍ണ്ണമെന്റില്‍ ടി.സി.സി തളങ്കരയെ തകർത്ത് മസ്ദാ ചൂരി ചാമ്പ്യന്മാര്‍
കാസര്‍കോട്: ജില്ലാ ക്രിക്കറ്റ് അസോസിയേഷന്റെ ആഭിമുഖ്യത്തില്‍ നടത്തിയ ജില്ലാ ലീഗ് ക്രിക്കറ്റ് എ ഡിവിഷന്‍ ടൂര്‍ണ്ണമെന്റില്‍ മസ്ദാ ചൂരി ചാമ്പ്യന്മാരായി. തളങ്കര ക്രിക്കറ്റ് ക്ലബ്ബിനെ ഒരു റണ്ണിനാണ് പരാജയപ്പെടുത്തിയത്. ടോസ് നേടി ആദ്യം ബാറ്റ് ചെയ്ത മസ്ദാ ചൂരി 33.3 ഓവറില്‍ 142 റണ്‍സിന് എല്ലാവരും പുറത്തായി. മസ്ദാ ചൂരിക്ക് വേണ്ടി മുഹമ്മദ് ഇര്‍ഷാദ് 54 റണ്‍സ് നേടി. തളങ്കരക്ക് വേണ്ടി സാദത്ത് കെ.എം, ശ്രീഹരി എസ്. നായര്‍, അശ്വിന്‍ എന്നിവര്‍ 3 വിക്കറ്റ് വീതം വീഴ്ത്തി. തളങ്കര ക്രിക്കറ്റ് ക്ലബ് 38.2 ഓവറില്‍ 141 റണ്‍സിന് എല്ലാവരും പുറത്തായി. തളങ്കരക്കു വേണ്ടി സാദത്ത് 38 റണ്‍സും അഷ്‌റഫ് പി.പി 31 റണ്‍സും നേടി. ചൂരിക്ക് വേണ്ടി അജ്മല്‍ അമീര്‍ 3ഉം, അല്‍ത്താഫ് ഇബ്രാഹിം, മുഹമ്മദ് നസീര്‍, മന്‍സൂര്‍ എം.എസ് എന്നിവര്‍ 2 വിക്കറ്റ് വീതം വീഴ്ത്തി.
ടൂര്‍ണമെന്റിലെ മികച്ച താരവും ഫൈനലിലെ താരവുമായി മസ്ദാ ചൂരിയുടെ മുഹമ്മദ് ഇര്‍ഷാദിനെയും മികച്ച ബാറ്ററായി തളങ്കര ക്രിക്കറ്റ് ക്ലബ്ബിന്റെ മുഹമ്മദ് അസറുദ്ദീനെയും മികച്ച ബൗളറായി ലേസ്യത്ത് ചെമ്മനാടിന്റെ അന്‍ഫല്‍ പി.എമ്മിനെയും തിരഞ്ഞെടുത്തു.
വിജയികള്‍ക്കുള്ള ട്രോഫി കെ.സി.എ മെമ്പര്‍ ടി.എം ഇക്ബാല്‍ വിതരണം ചെയ്തു. ജില്ലാ ക്രിക്കറ്റ് അസോസിയേഷന്‍ പ്രസിഡണ്ട് എന്‍.എ അബ്ദുല്‍ ഖാദര്‍, സെക്രട്ടറി ടി.എച്ച് മുഹമ്മദ് നൗഫല്‍, ട്രഷറര്‍ കെ.ടി നിയാസ്, വൈസ് പ്രസിഡണ്ടുമാരായ സലാം ചെര്‍ക്കള, ഫൈസല്‍ അടുക്കത്ത്ബയല്‍, വിനോദ് കുമാര്‍, ജോ. സെക്രട്ടറി അന്‍സാര്‍ പള്ളം, അസിസ്റ്റന്റ് സെക്രട്ടറി ഫൈസല്‍ പടിഞ്ഞാര്‍ സംബന്ധിച്ചു.
