0
0
ഗൾഫ് പ്രവാസികൾക്കുള്ള യാത്രാ നിർദ്ദേശം കർശനമാക്കി ഇന്ത്യൻ വിമാനക്കമ്പനികൾ; ശ്രദ്ധ കുറഞ്ഞാൽ യാത്ര മുടങ്ങിയേക്കാം
നാട്ടിലേക്കുള്ള യാത്രയ്ക്കായി ടിക്കറ്റെടുത്ത് കാത്തിരിക്കുന്ന ഗൾഫ് മലയാളികൾക്ക് ഏറെ പ്രധാനപ്പെട്ട അറിയിപ്പുമായി എയർ ഇന്ത്യ ഗ്രൂപ്പ്. ഗൾഫ്, മിഡിൽ ഈസ്റ്റ് രാജ്യങ്ങളിലെ വിവിധ വിമാനത്താവളങ്ങളിൽ അനുഭവപ്പെടുന്ന അമിതമായ യാത്രക്കാരുടെ തിരക്കും കർശനമായ സുരക്ഷാ-ഇമിഗ്രേഷൻ പരിശോധനകളും കണക്കിലെടുത്താണ് വിമാനക്കമ്പനികൾ പുതിയ യാത്രാ മാനദണ്ഡങ്ങൾ മുന്നോട്ടുവെച്ചിരിക്കുന്നത്.
എയർപോർട്ടിൽ എത്തേണ്ട സമയം: വിമാനം പുറപ്പെടുന്നതിന് കുറഞ്ഞത് 3 മണിക്കൂർ മുൻപെങ്കിലും വിമാനത്താവളത്തിൽ റിപ്പോർട്ട് ചെയ്യണം.
ഇമിഗ്രേഷൻ പൂർത്തിയാക്കാൻ: വിമാനം പുറപ്പെടുന്നതിന് ഒന്നര മണിക്കൂർ മുൻപെങ്കിലും ഇമിഗ്രേഷൻ നടപടികൾ പൂർത്തിയാക്കിയിരിക്കണം.
ബോർഡിങ് ഗേറ്റിൽ എത്താൻ: വിമാനം പുറപ്പെടുന്നതിന് 1 മണിക്കൂർ മുൻപെങ്കിലും ബോർഡിങ് ഗേറ്റിൽ എത്തിച്ചേരേണ്ടതാണ്.
നിശ്ചിത സമയത്തിന് മുൻപായി തന്നെ ബോർഡിങ് ഗേറ്റുകൾ അടയ്ക്കുമെന്നും, അതിനുശേഷം എത്തുന്ന യാത്രക്കാരെ വിമാനത്തിൽ കയറാൻ അനുവദിക്കില്ലെന്നും കമ്പനി വ്യക്തമാക്കിയിട്ടുണ്ട്.അവസാന നിമിഷത്തിലെ ധൃതി ഒഴിവാക്കി, കൃത്യസമയത്ത് എയർപോർട്ടിലെത്തി സുരക്ഷിതമായി നാട്ടിലേക്ക് യാത്ര തിരിക്കാൻ എല്ലാ പ്രവാസി സുഹൃത്തുക്കളും ശ്രദ്ധിക്കുക.എയർപോർട്ടിലേക്ക് ഇറങ്ങും മുൻപ് ശ്രദ്ധിക്കേണ്ട കാര്യങ്ങൾ
വിമാനത്താവളങ്ങളിലെ നീണ്ട ക്യൂവിൽ പെട്ട് യാത്ര മുടങ്ങാതിരിക്കാൻ ആവശ്യത്തിന് സമയം കണക്കാക്കി വേണം വീടുകളിൽ നിന്നോ താമസസ്ഥലങ്ങളിൽ നിന്നോ ഇറങ്ങാൻ. കൂടാതെ പാസ്പോർട്ട്, സാധുവായ വിസ, ടിക്കറ്റ് തുടങ്ങിയ എല്ലാ യാത്രാ രേഖകളും കൃത്യമായി കയ്യിൽ കരുതാനും എയർ ഇന്ത്യ ഗ്രൂപ്പ് നിർദേശിക്കുന്നു.
ചെക്ക്-ഇൻ കൗണ്ടറുകളിലെ ക്യൂ ഒഴിവാക്കാൻ സാധ്യമാകുന്ന ഇടങ്ങളിൽ ഓൺലൈൻ ചെക്ക്-ഇൻ സൗകര്യം പ്രയോജനപ്പെടുത്തുന്നതും നിങ്ങളുടെ സമയം ലാഭിക്കാൻ സഹായിക്കും.
പീക്ക് അവറുകളിലെ തിരക്കും വെബ് ചെക്ക്-ഇൻ സൗകര്യവും (Air India web check in Gulf)
ഗൾഫ് വിമാനത്താവളങ്ങളിൽ പ്രത്യേകിച്ച് രാത്രികാലങ്ങളിലെയും വാരാന്ത്യങ്ങളിലെയും പീക്ക് അവറുകളിൽ സാധാരണയേക്കാൾ വലിയ തിരക്കാണ് അനുഭവപ്പെടാറുള്ളത്. ഇമിഗ്രേഷൻ കൗണ്ടറുകളിലെയും സെക്യൂരിറ്റി ചെക്കിംഗിലെയും നീണ്ട ക്യൂവിൽ സമയം നഷ്ടപ്പെടാതിരിക്കാൻ യാത്ര പുറപ്പെടുന്നതിന് 24/48 മണിക്കൂർ മുൻപ് തന്നെ എയർ ഇന്ത്യ/എയർ ഇന്ത്യ എക്സ്പ്രസ് ആപ്പ് വഴിയോ വെബ്സൈറ്റ് വഴിയോ വെബ് ചെക്ക്-ഇൻ പൂർത്തിയാക്കുന്നത് ഏറെ ഉപകരിക്കും. ഇത് ബോർഡിംഗ് പാസ് വേഗത്തിൽ ലഭിക്കാനും കൗണ്ടറുകളിലെ ക്യൂ ഒഴിവാക്കാനും സഹായിക്കും.
ലഗേജ് അളവുകളും കൈവശമുള്ള രേഖകളും മുൻകൂട്ടി പരിശോധിക്കുക
വിമാനത്താവളത്തിലെ ചെക്ക്-ഇൻ കൗണ്ടറുകളിൽ സമയം ലാഭിക്കാൻ കൈവശമുള്ള ലഗേജിന്റെ ഭാരം അനുവദനീയമായ പരിധിക്കുള്ളിലാണെന്ന് ഉറപ്പുവരുത്തുക. അധിക ഭാരമുണ്ടെങ്കിൽ കൗണ്ടറിൽ കൂടുതൽ സമയം ചെലവഴിക്കേണ്ടി വരികയും അത് ബാക്കിയുള്ള നടപടികളെ വൈകിപ്പിക്കുകയും ചെയ്യും. കൂടാതെ, പാസ്പോർട്ട്, വിസ, റീ- എൻട്രി അനുമതി തുടങ്ങിയ രേഖകളുടെ പ്രിന്റഡ് അല്ലെങ്കിൽ ഡിജിറ്റൽ പകർപ്പുകൾ കൈവശം കരുതുന്നത് ഇമിഗ്രേഷൻ ലൈനുകൾ വേഗത്തിൽ പൂർത്തിയാക്കാൻ സഹായിക്കും.
