‘മരട്’ മോഡല് പൊളിക്കല് നോയിഡയിലും; “ട്വിൻ ടവര്” തകര്ത്തു നീക്കി, (വീഡിയോ കാണാം )
നോയിഡ: ഉത്തര്പ്രദേശിലെ നോയിഡയില് അനധികൃതമായി നിര്മിച്ച ഇരട്ട ഫ്ലാറ്റ് സമുച്ചയം പൊളിച്ചു നീക്കി. 3,700 കിലോ സ്ഫോടക വസ്തുക്കള് ഉപയോഗിച്ചാണ് കെട്ടിടം തകർത്തത്. എറണാകുളം മരടില് ഫ്ലാറ്റ് സമുച്ചയങ്ങള് പൊളിച്ച ദക്ഷിണാഫ്രിക്കന് സംഘമാണ് നോയിഡയിലെ ടവറും പൊളിച്ചത്. 560ന് മുകളില് പൊലീസ് ഉദ്യോഗസ്ഥരും എന്.ഡി.ആര്.എഫ് സംഘവും സ്ഥലത്ത് നിലയുറപ്പിച്ചിരുന്നു. പ്രദേശത്തുനിന്നും പൂര്ണമായും ആളുകളെ ഒഴിപ്പിച്ചുമാറ്റിയതിന് ശേഷമാണ് കെട്ടിടം തകര്ത്തത്.
പൊളിച്ചു നീക്കിയതില് ഇന്ത്യയിലെ ഏറ്റവും ഉയരം കൂടിയ കെട്ടിടമാണ് ഇന്ന് തകര്ത്തത്. ഒമ്പത് വര്ഷത്തെ നിയമപോരാട്ടത്തിനൊടുവില് സുപ്രിം കോടതിയാണ് ഇരട്ട ഫ്ലാറ്റ് സമുച്ചയം പൊളിക്കാന് ഉത്തരവിട്ടത്.നോയിഡ സെക്ടര് 93എയിലാണ് നിയമം ലംഘിച്ചു ഇരട്ട ടവറുകള് നിര്മിച്ചത്. സെയാന്(29 നില), അപെക്സ്(32 നില) എന്നീ ഫ്ലാറ്റ് സമുച്ചയങ്ങളില് ആയിരത്തോളം അപ്പാര്ട്മെന്റുകളാണുള്ളത്.
പൊളിക്കലിന്റെ ചെലവ് വഹിക്കേണ്ടത് ടവര് നിര്മാതാക്കളായ സൂപ്പര് ടെക് കമ്പനിയാണ്. ‘ഡിമോളിഷന് മാന്’ എന്നറിയപ്പെടുന്ന ജോ ബ്രിങ്ക്മാന്റെ നേതൃത്വത്തിലുള്ള സംഘമാണ് ഇന്ന് ഉച്ചയ്ക്ക് 2.30ന് ഇരട്ട കെട്ടിടങ്ങള് പൊളിച്ചു നീക്കിയത്.കെട്ടിടത്തിന്റെ വിവിധ ഭാഗങ്ങളിലായി 9000 സുഷിരങ്ങള് സൃഷ്ടിച്ച് സ്ഫോടക വസ്തുക്കള് നിറച്ചാണ് പൊളിച്ചു നീക്കിയത്.