0
0
വാഷിങ്ടണ്‍: ഒരുവട്ടം കണ്ണ് ഉടക്കിയാല്‍ ഇമവെട്ടാതെ നോക്കിപ്പോകും, സ്വര്‍ണവര്‍ണമണിഞ്ഞ് ആഡംബരത്തിന്‍റെ നേര്‍സാക്ഷ്യമായി ആകാശത്തും ഭൂമിയിലും പറന്നുനടന്ന ട്രംപിന്‍റെ ആ സ്വന്തം വിമാനം. വി.ഐ.പി യാത്രകള്‍, ഫോട്ടോഷൂട്ടുകള്‍ തുടങ്ങി പലതിനും മുന്‍ പ്രസിഡന്‍റ് അഭിമാനത്തോടെ ഉപയോഗിച്ചത്. കത്തിയും ഫോര്‍ക്കും പിടിച്ച്‌ വിമാനത്തിലിരുന്ന് കെ.എഫ്.സി, മക്ഡൊണാള്‍ഡ്സ് വിഭവങ്ങള്‍ കഴിക്കുന്നതിന്‍റെ ചിത്രങ്ങള്‍ വരെ പുറംലോകം ആസ്വദിച്ച്‌ കണ്ടു. 24 കാരറ്റ് സ്വര്‍ണത്തില്‍ തീര്‍ത്ത സീറ്റ് കൊളുത്തുകള്‍, അലങ്കൃതമായ ബാത്റൂമുകള്‍… അങ്ങനെ എന്തൊക്കെയായിരുന്നു.
ഈ ബോയിങ് 757 വിമാനം പക്ഷേ, മന്‍ഹാട്ടനില്‍നിന്ന് 60 കിലോമീറ്റര്‍ അകലെ ന്യൂയോര്‍കിലെ ഓറഞ്ച് കൗണ്ടിയില്‍ വെറുതെ വിശ്രമിക്കുകയാണിപ്പോള്‍, പഴയ പ്രൗഢിയുടെ നിഴലായി.
ഒരു എഞ്ചിനിന്‍റെ ചില ഭാഗങ്ങള്‍ അഴിച്ചുമാറ്റിയിട്ടുണ്ട്. രണ്ടാമത്തേത് പ്ലാസ്റ്റികില്‍ പൊതിഞ്ഞുവെച്ചനിലയിലും. ഇനിയും ലക്ഷക്കണക്കിന് ഡോളറുകള്‍ ഒഴുകിയാലേ ആകാശത്ത് ഈ വിമാനം പറക്കൂ. കോവിഡില്‍ കുടുങ്ങി ടൂറിസം മേഖല പഴയ നില പ്രാപിക്കാത്തതിനാല്‍ ട്രംപിന്‍റെ വിമാനവും അതിവേഗമൊന്നും തിരിച്ചുവരുമെന്ന് അമേരിക്കക്കാര്‍ പ്രതീക്ഷിക്കുന്നില്ല.
ഏറെയായി വിമാനം കട്ടപ്പുറത്താണെന്ന് മാധ്യമ റിപ്പോര്‍ട്ടുകള്‍ പറയുന്നു. ഇനി എന്നുമുതല്‍ യാത്ര പുനരാരംഭിക്കും എന്നതിനുമില്ല ഉത്തരം.
ട്രംപ് കൈവെച്ച ടൂറിസം അനുബന്ധ മേഖലകളില്‍നിന്ന് വരുമാനം നിലച്ചത് ബാധിച്ചതായാണ് സൂചന. മോശം കാലാവസ്ഥയില്‍ ഒന്നും ചെയ്യാതെ വിമാനം ഇട്ടേച്ചുപോന്നതിനാല്‍ തുരുെമ്ബടുക്കാന്‍ സാധ്യതയേറെ. മഞ്ഞും മഴയും ഈര്‍പവും തുടങ്ങി കാലാവസ്ഥയുടെ ഓരോ ഘടകവും ഇതിനു മേല്‍ പരിക്കേല്‍പിക്കും. ദീര്‍ഘനാള്‍ നിര്‍ത്തിയിടുന്ന വിമാനങ്ങള്‍ കുറെകൂടി അകലെ കാലാവസ്ഥ അത്രക്ക് ബാധിക്കാത്ത ഒരു മരുഭൂമിയിലാണ് പതിവായി നിര്‍ത്തിയിടാറ്. അത് വേണ്ടെന്നുവെച്ചാണ് അനാഥമായി കിടക്കുന്നത്.
കുറെകൂടി ചെറിയ എട്ടു സീറ്റ് സെസ്ന 750 കോര്‍പറേറ്റ് ജെറ്റ് ആണ് നിലവില്‍ ട്രംപ് ഉപയോഗിക്കുന്നത്.
2010ലായിരുന്നു ബോയിങ് 757 വിമാനം ട്രംപ് സ്വന്തമാക്കുന്നത്. മൈക്രോസോഫ്റ്റ് ശതകോടീശ്വരന്‍ പോള്‍ അലെന്‍റെതായിരുന്നു അതുവരെയും ഈ വിമാനം. പിന്നീട് അതിവേഗം ട്രംപിന് ഇഷ്ട യാത്രാവാഹനമായി. പ്രസിഡന്‍റ് തെരഞ്ഞെടുപ്പ് പ്രചാരണ ഘട്ടങ്ങളിലും ഇത് കൂടെ സഞ്ചരിച്ചു. പക്ഷേ, നല്ലകാലം കഴിഞ്ഞതോടെ വിമാനയാത്രക്ക് ചെലവ് വല്ലാതെ കൂടി. മണിക്കൂറിന് 15,000- 18,000 ഡോളര്‍ വരെ വേണമെന്നു വന്നതോടെ ശരിക്കും പ്രയാസം വന്നുമൂടി. എന്നല്ല, കൂടുതല്‍ നേരം പറത്താവുന്ന അവസ്ഥ വിട്ടതായും വ്യോമയാന രംഗത്തെ വിദഗ്ധര്‍ പറയുന്നു.
എഞ്ചിന്‍ പഴക്കവും ആവശ്യമായ ഭാഗങ്ങള്‍ സംഘടിപ്പിക്കാനുള്ള ബുദ്ധിമുട്ടും പരിഗണിച്ചാല്‍ ട്രംപ് ചെയ്തതു തന്നെ വഴി എന്നു വേണേല്‍ പറയേണ്ടിവരും. മിക്ക വിമാനസര്‍വീസുകളും 757 മോഡലുകള്‍ ഉപേക്ഷിക്കുന്നതാണ് കാലം. റോള്‍സ്റോയ്സ് എഞ്ചിനുകളിലൊന്ന് കാര്യമായ അറ്റകുറ്റപ്പണി വേണ്ട സാഹചര്യത്തിലാണ്. പോള്‍ അലന്‍ ഈ വിമാനം വാങ്ങുംമുമ്ബ് മെക്സികോയില്‍ വാണിജ്യ ആവശ്യത്തിന്സര്‍വീസ് നടത്തിയതാണ്. അതുകഴിഞ്ഞ് പോള്‍ അലനും ഉപയോഗിച്ചു. അദ്ദേഹം വില്‍ക്കുന്നുവെന്ന് കേട്ടപ്പോള്‍ ചാടിപ്പിടിച്ചതാണ്. പിന്നീട് ഫ്രാന്‍സില്‍നിന്ന് വരുത്തിയ അലങ്കാര വസ്തുക്കള്‍ ഉപയോഗിച്ച്‌ അകത്ത് ഒന്നാകെ മാറ്റി.
കഴിഞ്ഞ വര്‍ഷങ്ങളില്‍ ട്രംപിന്‍റെ ആസ്തിയില്‍ കാര്യമായ ഇടിവുണ്ടായതായാണ് റിപ്പോര്‍ട്ടുകള്‍. അടുത്തിടെ ന്യൂയോര്‍ക് ടൈംസ് റിപ്പോര്‍ട്ട് ചെയ്തത് 42 കോടി ഡോളറിലേറെ വ്യക്തിഗത ബാധ്യതയുണ്ടെന്നാണ്. അവയിലേറെയും അടുത്ത നാലു വര്‍ഷത്തിനുള്ളില്‍ അടച്ചുതീര്‍ക്കേണ്ടവയും. ഗോള്‍ഫ് കോഴ്സുകളുള്‍പെടെ സുപ്രധാന ബിസിനസ് സംരംഭങ്ങളിലേറെയും വന്‍നഷ്ടത്തിലാണ്. അതുവഴി 2016 ഫെബ്രുവരിയില്‍ 300 കോടി ഡോളര്‍ ആസ്തിയുള്ളത് ചുരുങ്ങിയത് 230 കോടി ഡോളറായി ചുരുങ്ങിയിട്ടുണ്ടാകുമെന്നാണ് കണക്കുകൂട്ടല്‍. 10 കോടി ഡോളര്‍ കൊടുത്തുവാങ്ങിയ ബോയിങ് 757 മോഡല്‍ ഇനി വില്‍പന നടത്തിയാല്‍ ഒരു കോടി ഡോളര്‍ പോലും തരപ്പെടില്ലെന്ന ആധി വേറെ.
228 യാത്രക്കാര്‍ക്കിരിക്കാവുന്ന വിമാനം ആഡംബരം കൂട്ടി 43 സീറ്റിലേക്ക് ചുരുക്കിയതിനാല്‍ വിമാനസര്‍വീസ് നടത്തുന്നവര്‍ എടുക്കാന്‍ സാധ്യത പിന്നെയും കുറവ്. വഴികളടഞ്ഞാകുമോ ട്രംപ് ഇവിടെ നിര്‍ത്തിയിട്ട് പോയത്? ഉത്തരത്തിനായി കാത്തിരിപ്പിലാണ് ലോകം.
