0
0
മുംബൈ: കാഴ്ചയില്‍ ഏറെ മാറിപ്പോയ അദ്നാന്‍ സമി ശരിക്കും ആളുകള്‍ക്കൊരു വിസ്മയമായിരുന്നു. 230 കിലോ ഭാരമുണ്ടായിരുന്ന പൊണ്ണത്തടിയനായ സമി ‘തേരാ ചെഹ്രാ’…അടക്കമുള്ള തകര്‍പ്പന്‍ പാട്ടുകളുമായി സംഗീത പ്രേമികളുടെ മുന്നിലെത്തിയപ്പോള്‍ ആ പാട്ടുകളുടെ മാസ്മരികതക്കൊപ്പം ഗായകന്‍റെ രൂപഭാവങ്ങളും ആളുകള്‍ക്ക് കൗതുകമായി. എന്നാല്‍, ഒന്നര വര്‍ഷത്തോളം നീണ്ട കഠിനപരിശ്രമത്തിനൊടുവില്‍ തന്‍റെ പൊണ്ണത്തടി കുറച്ച് സമി തിരിച്ചെത്തിയപ്പോള്‍ പലര്‍ക്കും അദ്ദേഹത്തെ മനസ്സിലായതേയില്ല. 230 കിലോയില്‍നിന്ന് ഒറ്റയടിക്ക് 75 കിലോയായി കുറഞ്ഞാണ് അദ്നാന്‍ സമി അതിശയം പകര്‍ന്നത്.
പഴയ കാലത്തെ ചിത്രം കഴിഞ്ഞ ദിവസം ട്വിറ്ററില്‍ പങ്കുവെച്ച്‌ അദ്നാന്‍ സമി തന്‍റെ പൊണ്ണത്തടിക്കുപിന്നിലെ കാരണം തുറന്നുപറഞ്ഞു.
ഒരുപാട് ഭക്ഷണം അകത്താക്കിയിരുന്നതുകൊണ്ടാണ് തടി വല്ലാതെ കൂടിപ്പോയതെന്നാണ് അദ്ദേഹത്തിന്‍റെ വെളിപ്പെടുത്തല്‍. ഭാര്യ റോയ സമി ഖാന്‍ തയാറാക്കിയ മട്ടന്‍ സ്റ്റ്യൂവിന്‍റെ (നിഹാരി) ചിത്രം സമി ട്വിറ്ററില്‍ പോസ്റ്റ് ചെയ്തിരുന്നു. ഇത് കണ്ട് ഒരു ആരാധകന്‍ കുറിച്ചതിങ്ങനെ -‘എണ്ണ വളരെ കൂടുതലാണ്. കണ്ടിട്ട് ശരിയായ നിഹാരി പോലെയില്ല. എന്നാലും കഴിക്കണമോയെന്ന് നിങ്ങള്‍ക്ക് തീരുമാനിക്കാം; നിങ്ങളുടെ ഇഷ്ടം’.ഇതിന് മറുപടിയായാണ് സമി തന്‍റെ പഴയ ചിത്രവും അതിനൊപ്പം ഒരു കുറിപ്പും പോസ്റ്റ് ചെയ്തത്. ‘ശരിയാണോ? നിങ്ങള്‍ ഇതിനു താഴെ ഭയങ്കര തടിയനായ ഒരാളെ കാണുന്നുണ്ടോ? അത് ഞാനായിരുന്നു. ‘സെലറി’ കഴിച്ചിട്ടല്ല ഞാന്‍ അങ്ങനെയായത്. ഒരുപാട് ഭക്ഷണം കഴിച്ചതാണ് ഞാന്‍ പൊണ്ണത്തടിയനാവാന്‍ കാരണം. ഭക്ഷണത്തെക്കുറിച്ച്‌ എന്നോട് തര്‍ക്കിക്കാന്‍ വരരുത്. അതില്‍ ഗവേഷണം നടത്തിയയാളാണ് ഞാന്‍. ഒരുപാട് തലമുറകള്‍ക്കുള്ള ഭക്ഷണം ഞാന്‍ ഇതിനകം തിന്നുകഴിഞ്ഞു. നിഹാരിയില്‍ എപ്പോഴും നെയ്യ് ഒരുപാടു ചേര്‍ക്കും’ -ഇതായിരുന്നു സമിയുടെ മറുപടി.
റൊട്ടി, ചോറ്, ഉരുളക്കിഴങ്ങ്, പഞ്ചസാര തുടങ്ങിയവയും ഏറെ കഴിക്കുമായിരുന്നുവെന്ന് മറ്റെരാളുടെ കമന്‍റിന് മറുപടിയായി സമി പറയുന്നു. കര്‍ശനമായ ഭക്ഷണ നിയന്ത്രണവും വ്യായാമവുമായി 16 മാസം െകാണ്ടാണ് സമി ശരീരഭാരം 75 കിലോ ആയി കുറച്ചത്.
