0
0
നെട്ടൂര്‍ (എറണാകുളം): നെട്ടൂരില്‍ ദേശീയപാതയോരത്ത് തലയുയര്‍ത്തി നില്‍ക്കുന്ന ‘മസ്ജിദുല്‍ ഹിമായ’ക്ക് മാനവസൗഹൃദത്തിെന്‍റ തേനൂറും കഥ പറയാനുണ്ട്. നാല്‍പതാണ്ടുമുമ്ബ് നെട്ടൂര്‍ പൂണിത്തുറ സ്വദേശി ഡാന്‍സര്‍ കെ. മാധവമേനോനാണ് പള്ളിക്ക് സ്ഥലം നല്‍കിയത്. പിതാവ് ഇട്ടിരാരിച്ച മേനോക്കിയുടെ സ്മരണക്ക് മാധവമേനോന്‍ ദാനമായി നല്‍കുകയായിരുന്നു. ഇപ്പോള്‍, ലുലു ഗ്രൂപ് ചെയര്‍മാന്‍ എം.എ. യൂസഫലിയുടെ പത്നി സാബിറ യൂസഫലി, തെന്‍റ മാതാവിന്‍െറ സ്മരണക്ക് പള്ളി പുനര്‍നിര്‍മിച്ചു.
അറേബ്യന്‍ മാതൃകയില്‍ പുനര്‍നിര്‍മിച്ച മസ്ജിദുല്‍ ഹിമായയുടെ ഉദ്ഘാടനം എം.എ. യൂസഫലി നിര്‍വഹിച്ചു. സാഹോദര്യത്തിന്‍െറ തണലിലാണ് ഇസ്ലാമും ക്രിസ്തുമതവുമൊക്കെ നമ്മുടെ രാജ്യത്ത് വളര്‍ന്നതെന്ന് യൂസഫലി പറഞ്ഞു.
ക്ഷേത്രങ്ങളും പള്ളികളും ചര്‍ച്ചുകളും തൊട്ടുരുമ്മി നില്‍ക്കുന്നത് സൗഹൃദത്തിന്‍െറ കാഴ്ചയാണ്. സഹവര്‍ത്തിത്വവും സാഹോദര്യവും ഈ കാലഘട്ടത്തിന്‍െറ ആവശ്യമാണ്. എല്ലാ മതസ്ഥരെയും സ്വീകരിച്ച പാരമ്ബര്യമുള്ള മഹത്തായ രാജ്യമാണ് നമ്മുേടതെന്നും അദ്ദേഹം പറഞ്ഞു.
പുനര്‍നിര്‍മിച്ച നെട്ടൂര്‍ മസ്ജിദുല്‍ ഹിമായയുടെ ഉദ്ഘാടനം ലുലു ഗ്രൂപ് ചെയര്‍മാന്‍ എം.എ. യൂസഫലി ഓണ്‍ലൈനായി നിര്‍വഹിക്കുന്നു
ചടങ്ങില്‍ മസ്ജിദുല്‍ ഹിമായ പ്രസിഡന്‍റ് പി.കെ. അബ്ദുല്‍ മജീദ് അധ്യക്ഷത വഹിച്ചു. മുന്‍ മന്ത്രി കെ. ബാബു, കെ.ബി. മുഹമ്മദ്കുട്ടി മാസ്റ്റര്‍, മസ്ജിദുല്‍ ഹിമായ സെക്രട്ടറി സി.എ. ഷംസുദ്ദീന്‍, വൈസ് പ്രസിഡന്‍റ് എം.എ. നൗഷാദ് എന്നിവര്‍ സംസാരിച്ചു. ഖതീബ് അഫ്സല്‍ മാഫി ദുആയും സുഹൈല്‍ ദാരിമി ഖിറാഅത്തും നിര്‍വഹിച്ചു.
മൂന്ന് നിലയിലായി 16,000 ചതുരശ്ര അടിയിലാണ് പള്ളിയുടെ നിര്‍മാണം. താഴത്തെ നിലയില്‍ ശീതീകരിച്ച പള്ളിയില്‍ മൂന്നുനിലയിലുമായി 1800 പേര്‍ക്ക് ഒരേസമയം പ്രാര്‍ഥിക്കാം. യാത്രക്കാരായ സ്ത്രീകള്‍ക്ക് പ്രാര്‍ഥനക്ക് പ്രത്യേക സൗകര്യവും ഇതോടൊപ്പം ഒരുക്കിയിട്ടുണ്ട്. 1978 ഒക്ടോബര്‍ 10നായിരുന്നു ആദ്യപള്ളിയുടെ ശിലാസ്ഥാപനം. 1981 നവംബര്‍ 22ന് പാണക്കാട് മുഹമ്മദലി ശിഹാബ് തങ്ങളാണ് ഉദ്ഘാടനം ചെയ്തത്.
